بقلم الكاتبة والمدربة دعاء وجيه مقابلة
أصعب أنواع الخذلان مش إنك تخسر شخصًا كنت تحبه بل إنك تكتشف إنك كنت شايف فيه أشياء ما كانت موجودة فيه من الأساس.
إنك تعطي من قلبك وتسامح أكثر من مرة وتبرر الغياب وتلتمس الأعذار وتضل تحكي لنفسك إنه بكرا رح يتغير وإنه أكيد حاسس فيك حتى ييجي اليوم اللي تفهم فيه إنك كنت لحالك بكل هالحكاية.
الخذلان مش دايمًا بيكون بكلمة جارحة أو موقف كبير أحيانًا بيكون بنظرة باردة من شخص كان زمان يخاف على زعلك وبصمت طويل من شخص كنت تحكيله كل تفاصيلك وبغياب وقت كنت محتاج فيه وجوده أكثر من أي وقت.
والأصعب من الخذلان نفسه إنك تبدأ تراجع حالك وتسأل وين غلطت وشو قصرت وليش ما كنت كفاية مع إنك يمكن أعطيت أكثر مما لازم وضحيت بأشياء من نفسك حتى تحافظ على أشخاص ما فكروا للحظة شو عم تخسر وأنت بتحاول ترضيهم.
لكن مع الوقت بتتعلم إن مش كل شخص أعطيته قلبك بيعرف يحافظ عليه ومش كل شخص وقفت معه رح يوقف معك ومش كل علاقة تمسكت فيها كانت تستحق منك كل هالتعب.
بتتعلم إن الطيبة مش ضعف وإن التسامح مش معناه تسمح لنفس الوجع يتكرر وإن الحب مهما كان صادق ما لازم يكون على حساب كرامتك وراحتك وسلامك الداخلي.
وفي لحظة معينة بتتعب من التبرير وبتبطل تستنى الاعتذار وبتبطل تحاول تثبت إنك كنت صادق وبتختار تسكت مش لأنك ما عندك حكي ولكن لأنك فهمت إن في أشياء ما بتتصلح بالكلام وإن في أشخاص مهما شرحتلهم وجعك رح يضلوا يشوفوا الأمور من جهتهم فقط.
وهون بتبدأ ترجع لحالك.
مش لأنك صرت قاسي ولا لأن قلبك مات ولكن لأنك أخيرًا فهمت إنك كمان إلك حق بالاهتمام وإنك مش مجبور تضل بمكان يستنزفك حتى تثبت إنك وفي وإنك مش مطالب تشرح وجعك ألف مرة لشخص كان سبب فيه.
الخذلان ممكن يغيرك لكنه مش لازم يحولك لشخص يشبه اللي خذلك.
خليك طيب بس بوعي سامح إذا قدرت بس لا تنسى الدرس أحب بصدق بس لا تخسر نفسك وأنت بتحاول تحافظ على غيرك.
وفي النهاية يمكن أكبر انتصار بعد الخذلان مش إنك تخلي الشخص يندم على خسارتك بل إنك توصل لمرحلة ما تعود فيها خسارته تكسر فيك شيئًا.
لأنك ببساطة صرت تعرف قيمتك وما عدت تنتظر من أحد أن يثبتها لك.
