فيه مشاعر جوانا أكبر من الكلام. وكل ما نحاول نعبر عنها نحس إن الحروف مهما كانت جميلة عاجزة توصل اللي في القلب. ويمكن أصعب المشاعر دي هي مشاعر الأب تجاه بنته. البنت اللي بتكبر قدام عينيه وتبني حياتها وبيتها. بينما تفضل في قلبه نفس الطفلة اللي كانت ضحكتها قادرة تنسيه تعب الدنيا كلها.
يا بنتي. كبرتي وبقى ليكي بيتك وحياتك وتفاصيلك اللي تخصك. وبقيتي صاحبة مشوار خاص بيكي. لكن فيه حاجات الزمن مهما عدى عليها ما بتتغيرش. هتفضلي بنتي اللي قلبي بيفرح لفرحتها ويتوجع لوجعها. واللي مهما حاولت أخبي خوفي عليها تفضحني دعوة طالعة من قلبي كل ما أفتكرها.
يمكن ما بقولكيش كل يوم بحبك قد إيه. ويمكن ساعات تعجزني الكلمات وأبقى مش عارف أقولك إيه ولا أشرحلك اللي جوايا. لكن صدقيني يا بنتي. فرحتك عندي مش مجرد خبر حلو. دي راحة بتدخل قلبي وترد لروحي عافيتها. ووجعك مش حاجة تخصك لوحدك. ده وجع بيوصل لأبعد نقطة جوايا حتى لو كنتي بعيدة عن عيني.
أنا مش بتمنى من الدنيا إنها تديكي كل حاجة. أنا بتمنى إنها تكون رحيمة بقلبك. وإن ربنا يعوضك عن كل تعب براحة وعن كل خوف بأمان وعن كل لحظة ضيق بفرحة تنسيكي اللي فات. بدعي لك في سري إن بيتك يفضل عامر بالمودة وإن الضحكة ما تفارقش وشك وإنك تنامي وقلبك مطمن وتصحي وعندك ألف سبب يخليكي تحبي الحياة.
يمكن الأيام أخدت كل واحد فينا لطريقه. ويمكن ما بقيناش نعيش نفس التفاصيل اللي كانت بتجمعنا زمان. لكن الأبوة عمرها ما كانت مسألة قرب المسافات. الأبوة قلب يفضل مفتوح لبنته مهما كبرت ومهما اتغيرت الدنيا حواليها. قلب ما بيطلبش مقابل ولا يستنى شكر. كل أمنيته إنه يشوفها بخير.
يا بنتي. لو سألتيني إيه اللي بتمناه من العمر بعد كل السنين دي. هقولك بكل بساطة إني أشوفك سعيدة. أشوف قلبك مرتاح وعينيكي مليانة رضا. وأفضل طول ما ربنا مد في عمري سند ليكي وضهر تستندي عليه ودعوة حلوة تسبق خطاكي وتحاوطك حتى في الأيام اللي ما أكونش فيها جنبك.
كبرتي يا بنتي. لكن فيه مكان جوايا الزمن ما قدرش يكبره ولا يغير ملامحه. مكان لسه شايل صورتك الصغيرة وضحكتك الأولى وكل لحظة حسيت فيها إن ربنا اداني نعمة أكبر من قدرتي على الشكر.
هتفضلي بنتي مهما كبرتي. وهتفضلي حتة من قلبي مهما الأيام عدت. ولو كان ليا أمنية أخيرة أسيبها في الدنيا دي فهي إن ربنا يسعد قلبك أضعاف السعادة اللي دخلتيها قلبي من يوم ما جيتي الدنيا.
اللهم احفظ ابنتي بعينك التي لا تنام واكتب لها من الخير أجمله ومن السعادة أكملها ومن راحة البال نصيبا لا ينقطع.
مدحت الحلفاوي
